Dështon miqësorja Kosovë - Brazil

Ndeshja e shumëpritur miqësore, ndërmjet përfaqësueses së Kosovës dhe skuadrës olimpike të Brazilit, e paraparë për t'u zhvilluar më 25 korrik në Gjenevë ka dështuar. Një lajm të tillë e kanë konfirmuar sot drejtuesit e Federatës së Futbollit të Kosovës nëpërmjet një kumtese për media. "Me keqardhje ju njoftojmë, se me gjithë dëshirën e madhe dhe përpjekjeve maksimale dhe të vazhdueshme gjatë këtyre ditëve të krerëve të FFK-së, ndeshja aq shumë e dëshiruar nga ana e FFK-së, por edhe nga ana e futbolldashësve kosovarë ndërmjet Përfaqësueses së Kosovës së Përfaqësuese Olimpike të Brazilit e paraparë për datën 25 korrik në Gjenevë nuk do të zhvillohet. Ashtu siç është njohur opinioni i Kosovës, të hënën në FFK kishte arritur ftesa përmes ndërmjetësit për ndeshje ndërkombëtare Mark Biolli që njëkohësisht është dhe agjent i FIFA-s, për këtë ndeshje dhe FFK-ja kishte nisur të gjitha përgatitjet e nevojshme për këtë takim, megjithatë FIFA ka vonuar në përgjigjen e saj për lejimin zhvillimit të kësaj ndeshje. Më herët për zhvillimin e ndeshjes ishte pajtuar jo vetëm Brazili e Kosova, por edhe autoritet zvicerane që kjo ndeshje të zhvillohet në shtetin e tyre, ndërsa të enjten FIFA ka kërkuar edhe një konfirmim të ri nga ana e Brazilit dhe Zvicrës. Dhe për shkak të kësaj zvarritje të përgjigjes nga ana e FIFA-s, Brazili është detyruar që të gjejë zgjidhje tjetër, pra për një ndeshje tjetër miqësore dhe ka udhëtuar për në Singapor me qëllim të përgatitjes së më të mirë për LO si domosdoshmëri që të ketë ndeshje kontrolluese para udhëtimin në Pekin. Në të vërtet FIFA nuk e ka refuzuar zhvillimin e ndeshjes përkundër asaj që në shumë mediume serbe është shkruar se FIFA e ka ndaluar zhvillimin e ndeshjes, por me zvarritjen e vendimit për këtë ndeshje, ka detyruar rivalin Brazilin që të gjejë një rival tjetër për ndeshje miqësore, duke mos qenë e gatshme për të pritur më gjatë", thuhet në kumtesën e FFK-së.

Megjithëkëtë, FFK-ja është e vendosur që të punojë dhe të angazhohet edhe më shumë në ndërkombëtarizimin e futbollit të Kosovës. FFK-ja vlerëson se përkundër që kjo ndeshje nuk u realizua, të paktën ka arritur efektin e saj duke qenë në agjendat e FIFA-s dhe të komunitetit të futbollit evropian dhe botëror si dhe ndër top-lajmet kryesore të mediave të Kosovës dhe botërore. FFK-ja falënderon Federatën e Futbollit të Brazilit që ka përzgjedhur pikërisht përfaqësuesen e Kosovës për një ndeshje miqësore sikur që edhe Federatën e Futbollit të Zvicrës që ka pranuar mikpritjen e kësaj ndeshjeje. Po ashtu FFK-ja falënderon të gjitha mediat e Kosovës për pasqyrimin korrekt dhe nxitje mediave të kësaj ngjarje me rëndësi për futbollin e Kosovës.__________________